कांदा-सोयाबीन दरात मोठी तेजी! लाल कांदा ₹५,२६१ तर सोयाबीन ₹७,१०० प्रतिक्विंटल; शेतकऱ्यांना दिलासा
उमराणे कृषी उत्पन्न बाजार समितीत दिवाळीच्या पार्श्वभूमीवर लाल कांदा आणि सोयाबीनला चांगला दर मिळाला. लाल कांद्याचा कमाल भाव ५,२६१ रुपये, तर सोयाबीनचा कमाल भाव ७,१०० रुपये प्रतिक्विंटल नोंदवण्यात आला.
- लेखक / प्रतिनिधी
- जय किसान डेस्क
- प्रकाशित तारीख
- ७ नोव्हेंबर, २०२६
- प्रकाशित वेळ
- संध्याकाळी ४:१६
- शेवटचे अपडेट
- ७ नोव्हेंबर, २०२६, संध्याकाळी ४:१९
- बातमीचा स्रोत
- online
फोटो: AI
मालेगाव : दिवाळीच्या पार्श्वभूमीवर शेतकऱ्यांसाठी आनंदाची बातमी समोर आली आहे. उमराणे येथील स्व. निवृत्ती काका देवरे कृषी उत्पन्न बाजार समितीत गुरुवारी झालेल्या लिलावात लाल कांदा आणि सोयाबीनला चांगला भाव मिळाला. बाजार समितीत दिवसभरात एकूण १,५७३ वाहनांची आवक झाली.
लाल कांद्याला ५,२६१ रुपयांचा उच्चांकी भाव
लाल कांद्याला प्रतिक्विंटल कमाल ५,२६१ रुपये दर मिळाला. सरासरी भाव ४,६०० ते ५,००० रुपयांदरम्यान राहिला. उन्हाळी कांद्याचा कमाल दर ४,२०० रुपये, तर सरासरी दर ३,६०० ते ४,०५० रुपये होता.
सोयाबीनला किती भाव मिळाला?
सोयाबीनला प्रतिक्विंटल कमाल ७,१०० रुपये दर मिळाला. तर सरासरी भाव ६,९०० रुपये नोंदवण्यात आला. त्यामुळे सोयाबीन उत्पादक शेतकऱ्यांना दिलासा मिळाला आहे.
कांदा, सोयाबीन आणि मका बाजारभाव शेतमाल प्रतिक्विंटल दर लाल कांदा कमाल ₹५,२६१ उन्हाळी कांदा कमाल ₹४,२०० सोयाबीन कमाल ₹७,१०० मका (सुपर क्वालिटी) ₹३,००० ते ₹३,१२५ मका (सर्वसाधारण) ₹२,९०० ते ₹३,०००
बाजार समितीत १,५७३ वाहनांची आवक
गुरुवारी बाजार समितीत उन्हाळी कांद्याची ७६५, लाल कांद्याची २२४, मक्याची ५७० आणि सोयाबीनची १४ वाहने दाखल झाली. मोठ्या प्रमाणातील आवकेमुळे बाजार समितीत दिवसभर लिलावाची लगबग होती.
दिवाळीनंतर लिलाव कधी सुरू होणार?
दिवाळीनिमित्त बाजार समितीतील लिलाव बंद ठेवण्यात आले आहेत. दिलेल्या वेळापत्रकानुसार सोमवारी, १६ तारखेला सकाळी ९:३० वाजता कांदा लिलाव, तर सकाळी १० वाजता मका व इतर भुसार शेतमालाचे लिलाव सुरू होणार आहेत.
शेतकऱ्यांनी विक्रीची रक्कम त्याच दिवशी घ्यावी आणि अडचण आल्यास बाजार समिती कार्यालयाशी संपर्क साधावा, असे आवाहन प्रशासनाने केले आहे.
