गोव्यानंतर आता महाराष्ट्रात मुसळधार पावसाचा अंदाज; विदर्भ-मराठवाड्यात ३ दिवस अलर्ट!

महाराष्ट्र : गोव्यात अनेक ठिकाणी मुसळधार पावसाने जोरदार हजेरी लावल्यानंतर आता महाराष्ट्रातही पावसाची शक्यता वर्तवण्यात आली आहे. बंगालच्या उपसागरात निर्माण होत असलेल्या हवामान प्रणालीमुळे राज्यातील काही भागांत पुन्हा पावसाचे वातावरण तयार होण्याचा अंदाज आहे. विशेषतः विदर्भ आणि मराठवाड्यात २७ ते २९ ऑक्टोबरदरम्यान पाऊस पडण्याची शक्यता व्यक्त करण्यात आली आहे.

गोव्यात मुसळधार पावसामुळे जनजीवन विस्कळीत

गोव्याची राजधानी पणजीसह उत्तर गोवा, दक्षिण गोवा आणि कुशावती जिल्ह्यातील काही भागांत जोरदार पाऊस झाला. वादळी वारे आणि विजांच्या कडकडाटासह झालेल्या पावसामुळे अनेक ठिकाणी रस्त्यांवर पाणी साचले. काही भागांत झाडे उन्मळून पडली, तर घरांवर झाडे पडल्याने नुकसान झाल्याचे वृत्त आहे.

बंगालच्या उपसागरातील हवामान प्रणालीकडे लक्ष

बंगालच्या उपसागरात कमी दाबाचे क्षेत्र तयार झाले असून, त्याची तीव्रता वाढल्यास हवामानावर मोठा परिणाम होण्याची शक्यता आहे. या प्रणालीची दिशा आणि तीव्रता यावर महाराष्ट्रातील पावसाचे स्वरूप अवलंबून राहणार आहे. भारतीय हवामान विभागाच्या अंदाजानुसार, पुढील काळात देशातील काही भागांत मुसळधार ते अतिमुसळधार पाऊस पडू शकतो.

विदर्भ-मराठवाड्यात २७ ते २९ ऑक्टोबरदरम्यान पावसाची शक्यता

राज्यातील विदर्भ आणि मराठवाडा विभागांत या तीन दिवसांत ढगाळ वातावरण निर्माण होऊन काही ठिकाणी पाऊस पडण्याची शक्यता आहे. वादळी वाऱ्यांचाही परिणाम जाणवू शकतो. मात्र, पावसाची तीव्रता आणि नेमके प्रभावित होणारे भाग हे पुढील हवामान बदलांवर अवलंबून असतील.

अनेक राज्यांमध्ये पावसाचा अंदाज

महाराष्ट्रासह तामिळनाडू, केरळ, कर्नाटक, आंध्र प्रदेश, ओडिशा, पश्चिम बंगाल, झारखंड, मध्य प्रदेश, छत्तीसगड, बिहार, उत्तर प्रदेश आणि इतर काही भागांतही पावसाची शक्यता वर्तवण्यात आली आहे. काही ठिकाणी ताशी ४० ते ९० किलोमीटर वेगाने वारे वाहण्याचा अंदाज व्यक्त करण्यात आला आहे.

शेतकऱ्यांनी सतर्क राहावे

हवामानातील संभाव्य बदल लक्षात घेता शेतकऱ्यांनी काढणी केलेली पिके सुरक्षित ठिकाणी ठेवावीत. पावसाचा अंदाज लक्षात घेऊन शेतीची कामे आणि पिकांचे नियोजन करावे. वादळी वारे, विजांचा कडकडाट किंवा मुसळधार पाऊस असल्यास सुरक्षित ठिकाणी थांबावे